A Irmandade das Meigas Pagás de Galiza é unha relixión pagá iniciática e mistérica, que convida a percorrer a senda da antiga espiritualidade galega. A través dela, descubrirás os nosos Deuses, a nosa maxia e as tradicións máis profundas da nosa Terra.

A nosa base susténtase na recuperación das crenzas ancestrais que permaneceron vivas ou documentadas. Alí onde o fío da transmisión se perdeu no tempo, completamos o noso saber coas costumes e cosmovisións do resto da Europa celta, mantendo sempre a coherencia coa nosa identidade.

O paganismo galaico é o estudo e a práctica da relixión precristá de Galicia: os seus ritos, os seus mitos e a súa espiritualidade. Porén, non nos limitamos a mirar cara atrás; non somos só reconstrucionistas. Entendemos que o paganismo debe ser unha realidade viva, capaz de dar resposta e sentido á nosa vida na actualidade.

Residas onde residas, as portas da Irmandade están abertas pra ti.